Ministri i Shtetit për Diasporën, Pandeli Majko, gjatë fjalës së tij sot në seancën plenare në Kuvend, kërkoi nga KQZ-ja zbatimin e votimit të shtetasve shqiptar, të cilët jetojnë jashtë vendit.
I thirrur në një interpelancë nga një grup deputetësh të opozitës, Majko u shpreh se realizimi i të drejtës së votës për shqiptarët jashtë vendin është detyrim ligjor, teksa shpreson që KQZ të mos kërkojë konsensus për zbatimin e ligjit.
“Janë miratuar dy nene. Si ministër kam raportuar në Kuvend. Raportimet kanë qenë të rregullta. Kuvendi në datën 23 korrik 2018 ka miratuar rezolutën për Diasporën. Kam raportuar pranë kryetarit të Kuvendit. Për interesimin e deputetëve kam qenë dhe jam në komunikim me KQZ.
Kjo ka ndodhur edhe me KQZ e mëparshme që gjej rastin t’i falenderoj. KQZ aktuale po paguan koston e sorollatjes së politikës. Reforma zgjedhore u realizua vetë në momentin e fundi. Votimi i shtetasve jashtë vendit nuk ka asnjë pengesë. Është plotësuar çdo angazhim ligjor nga ekzekutivi. Arsyetimi i KQZ-së se duhet pritur konsensusi i partive jashtë Kuvendit, është joligjor. Imagjinoni që ky standard të përdorej edhe për ligje të tjera. Nga PD ka pasur komente se pengesë është edhe çështja e regjistrimit. Procesi i regjistrimit dhe rinovimit të kartave edhe në këtë aspekt ministria e brendshme e ka shtyrë deri në prill.
Realizimi i të drejtës së votës për shqiptarët jashtë vendin është detyrim ligjor. Shpresoj që KQZ të mos kërkojë konsensus për zbatimin e ligjit ai është detyrim dhe jo çështje për diskutim. “, tha Majko./Opinion.al
