Komisioni Qendror i Zgjedhjeve ka dal pak minuta më parë me një vendim të ri lidhur me procesin e numërimit të votës së diasporës për zgjedhjet parlamentare të 11 Majit.
Nëpërmjet një vendimi zyrtar, KQZ njofton anulimin e akreditimit për të gjithë vëzhguesit në Parkun Olimpik, ku përjashtim bëjnë vëzhguesit ndërkombëtarë.
Sipas vendimit, çdo subjekt zgjedhor ka të drejtë të ketë vetëm një vëzhgues për çdo grup numërimi, si dhe një vëzhgues për çdo qark.
Po ashtu, organizatat e shoqërisë civile që dëshirojnë të vëzhgojnë procesin duhet të riparashtrojnë kërkesën për akreditim përmes Portalit të Vëzhguesve, jo më vonë se ora 24:00 e datës 16 maj 2025. Çdo kërkesë e dorëzuar jashtë këtij afati nuk do të merret në shqyrtim nga KQZ.
Kundër këtij vendimi, palët e interesuara mund të paraqesin ankim pranë Komisionit të Ankimimeve dhe Sanksioneve brenda tre ditëve nga data e marrjes së tij.
Ky vendim synon të rrisë transparencën dhe integritetin e procesit të numërimit të votave, duke kufizuar aksesin e vëzhguesve jo të akredituar dhe duke forcuar rolin e vëzhguesve ndërkombëtarë dhe të subjekteve të regjistruara.
