Aeroporti Nënë Tereza bën me dije se kompania Fly Ernest do të ketë vonesa të shumta e madje edhe anullime deri më 13 janar, ditë e cila përkon edhe me afatin për pezullimin e licensës nga Aviacioni Civil Italian.
Autoriteti Civil Shqiptar u rekomandon pasagjerëve që nuk e kryejnë dot fluturimin me Fly Ernest dhe zgjedhin të presin një biletë me një kompani tjetër, të bëjnë kërkesë për rimbursim dhe kompensim nëpërmjet sistemit të kompanisë në faqen e tyre në internet.
Sipas të dhënave të Aviacionit Civil Shqiptar kompania ERNEST SPA rezulton një nga kompanitë më problematike përsa i përket vonesave ku vetëm gjatë muajit Nëntor 2019 ka pësuar 4 vonesa në mbi 2 orë dhe 1 anulim.
Sakaq, në motivacionin për pezullimin e kontratës, Aviacioni Civil Italian, shpjegonte se kjo kompani fluturimesh vononte fluturimet për pasagjerët si dhe ngatërronte destinacionin e tyre pa iu dhënë në këmbim asnjë lloj dëmshmërblimi financiar dhe pa garantuar mbërritjet e tyre në destinacionin e prenotuar./Opinion.al
