Presidentja e Komisionit Europian Ursula von der Leyen, ka thënë se embargoja e naftës ndaj Rusisë e shpallur në fillim të kësaj jave nuk do të ishte e lehtë, por se BE-ja nuk mund të vazhdojë të transferojë para në Moskë në afat të gjatë.
Ajo gjithashtu theksoi se BE-ja duhet të zvogëlojë varësinë e saj nga gazi rus dhe se Rusia nuk është më një partner i besueshëm.
Përfaqësuesit e BE-së do të takohen sërish të premten, në bisedimet që pritet të zgjasin edhe në fundjavë, për të negociuar paketën e re të sanksionesh të BE-së kundër Rusisë.
Von der Leyen u shpreh se BE-së ishte “në anën e Ukrainës”: “Ne duam që Ukraina të fitojë këtë luftë,” citohet të ketë thënë ajo nga agjencia e lajmeve Reuters.
Më tej ajo tha se i takon Ukrainës të vendoste se si të negociojë me Rusinë për të arritur një armëpushim.
