Bashkimi Europian do të nënshkruajë së shpejti një kontratë me kompaninë Pfizer dhe BioNTech për të siguruar 300 milionë doza të vaksinës së saj kundër COVID-19.
Lajmin e dha presidentja e Komisionit Europian, Ursula von der Leyen në një postim në rrjetet sociale.
“KE shumë shpejt do të firmosë një kontratë me Pfizer e BioNTech për të siguruar të paktën 300 milionë doza të vaksinës antiCovid”, shkruan von der Leyen.
Lajmi se kompania Pfizer në bashkëpunim BioNTech, kishte arritur të prodhonte një vaksinë të sigurt që krijonte mbrojtje ndaj COVID-19 në 90% të rasteve, u prit me entuziazëm në shumë vende të botës pasi erdhi në një moment kur vala e dytë e pandemisë po detyron shumë vende të mbyllen.
Megjithatë, Von der Leyen, ashtu si disa prej liderëve të vendeve më të mëdha, iu kërkoi qytetarëve që të mos ulin vigjilencën pasi për të dalë vaksina në treg duhen ende disa muaj./ Opinion.al
