Këshilli Bashkiak i Shkodrës ka paditur kryebashkiaken Voltana Ademi për shkak të emërimeve dhe zëvendësimeve të anëtarëve të Këshillit Mbikëqyrës të klubit të futbollit të Vllaznisë.
Objekti që propozohet për çeljen e procesit është ai i kundërshtimit të vendimit të kryetares së bashkisë për “Miratimin e pasqyrave financiare të vitit 2018 të shoqërisë Klubi i futbollit sh.a Vllaznia” si dhe “Për zëvendësimin dhe emërimin e anëtarëve të këshillit mbikëqyrës të shoqërisë.
Vetë kryebashkiakja thotë se nuk është njohur me pretendimet nga këshilli. Ademi thotë se do të shqyrtojë me vëmendje dhe do të japë përgjigje për çdo paqartësi në aplikim të ligjit.
Ajo u dërgoi këshillit dhe vendimet e kryetarëve të bashkive Vlorë, Kamëz e Lushnje për vendimet që ato kanë marrë.
“Nuk jam njohur me projekt vendimet. E kam dëgjuar për herë të parë përmes televizionit. Jam e qetë në ushtrimin e detyrës time me korrektesë. Nga paraqitja në seancën e këshillit teknikisht asgjë nuk kuptova nga pretendimet. Do ta lexoj me vëmendje dhe do të hedh dritë me profesionalizëm për çdo paqartësi në aplikim të ligjit nëse kanë. Meqënëse më pyet, po ju dërgoj vendimet e të gjithë kryetarëve të Bashkive Vlorë, Kamëz, Lushnjë, etj. Ata me tagrin që u jep ligji kanë ushtruar detyrën sikurse ligji parashikon. Nuk besoj se Shkodra për faktin e të qenurit në opozitë bën ndonjë përjashtim”, thotë Ademi.
Kujtojmë se Voltana Ademi po qëndron në shtëpi këto ditë, pasi është prekur nga koronavirusi. /Opinion.al
