Deputetja e Partisë Demokratike, Albana Vokshi ishte e pranishme në Gjykatën e Tiranës, ku u dha masa e sigurisë për dy protestuesit e arrestuar në protestën e thirrur të hënën nga ish-kryeministri Sali Berisha.
Në një prononcim për mediat, Vokshi tha se arrestimi i dy protestuesve ishte i paligjshëm. Po ashtu ajo shtoi se protestat ndaj Ramës nuk do të ndalohen.
Gjithashtu në prononcimin për mediat u tha se arrestimi i tyre ishte politik dhe u bë pas një reagimi të kryeministrit Rama në rrjetet sociale.
“Duam t’i bëjmë me dije Edi Ramës dhe gjithkujt që ndodhet pas tij dhe harton këto plane antikombëtaret, protestat që kanë filluar ndaj tij nuk do të ndalen.
Komisioni për Rithemelimin e PD është në mbledhje të përditshme dhe shumë shpejt do t’i bëjmë me dije planin e organizimit apo aktiviteteve në ditët dhe javët e ardhshme”.
