Deputetja e PD, Albana Vokshi e ka quajtur të turpshëm faktin që emri i Sali Berishës nuk është lexuar, gjatë kërkesës së bërë nga 7 deputetë të PD për interpelancë me kryeministrin Edi Rama.
Gjatë fjalës së saj nga foltorja, Vokshi u shpreh se as emrin nuk ia lexojnë dot se sipas saj Berisha i tmerron.
Ndërkohë nënkryetarja e Kuvendit Ermonela Felaj, tha se për Berishën ka një vendim nga gjykata që i është ndaluar pjesëmarrja në Kuvend.
Vokshi: As emrin nuk ia përmendni. Është firmosur nga zoti Sali Berisha, kryetari PD-së. Kjo është e turpshme. Nuk guxoni që t’ia lexoni as emrin që të bëjë interpelancë me Ramën. E keni aty. Është i pari mes 6 emrave. Më jepni 10 minuta.
Felaj: Duhet të flisni për çështjen e ditës, jo për procedurë. S’jua jap dot 10 minuta për procedurë. Respektoni rregulloren.
Felaj-Spaho: Ku e gjeni ju të drejtën, kur nuk ia ka dhënë gjykata të drejtën. Ku e gjeni të drejtën juve? Zotit Berisha i është ndalura pjesëmarrja në Parlament, me vendim gjykate.
Vokshi: Nuk mund të bëni komente ndaj çdo deputeti të opozitës. Nuk mund të ndërhyni. Jemi deputetë që përfaqësojmë qytetarët, kush jeni ju që të na mësoni se çfarë do të flasim. Ju as emrin nuk ia lexoni dot Berishës, se ju tmerron. Kush është ai vendim gjykate? Po mashtroni përsëri që Berisha të ushtrojë të drejtën e deputetit.
