Gratë demokrate do të organizojnë ditën e martë një protestë para kryeministrisë në shenjë proteste ndaj fjalorit të ulët të përdorur sipas selisë blu nga shefi i qeverisë, Edi Rama ndaj femrave deputete demokrate. Lajmin e ka bërë të ditur deputetja e PD-së, Albana Vokshi, njëherazi kryetare e Lidhjes Demokratike të Gruas.
“Byroja dënoi 3 deputete të PD si në diktaturë ku Byroja e partisë i përjashtonte njerëzit nga partia. Unë dhe kolegët e mi jemi dëshmitarë të fjalorit të ulët të kryeministrit. Nuk mundet Byroja të thotë që ne nuk i kishim pamjet. Si mundet ai kryeministër të përdorë atë fjalor? Jemi nëna. Përse fëmijët tanë të dëgjojnë këtë lloj dhune. Të gjitha ne gratë demokrate ndihemi të fyera nga ky kryeministër sepse ka dhunë pa fund dhe këtu shtoj dhunën që u ushtrua me urdhër të Ramës dhe ndaj gruas tek Liqeni. Nuk e dhunon dot ti një grua. Në reagim të dhunës së përhershme që ushtron Rama në Parlament dhe jashtë tij, ndaj grave, nënave, në reagim të dhunës që po ushtron në jetën e përditshme, ditën e martë, ora 12:00 demokrate dhe jo demokrate, nënat dhe motrat, do protestojmë para kryeministrisë sepse ne nuk e durojmë dot më dhunën verbale dhe psikologjike të Ramës”, u shpreh Vokshi.
