Kjo vajzë mori pjesë në një lojë mes miqsh, se kush do të pinte më shumë vodka, por përfundoi në koma.
Nëna e saj Melissa Aho publikoi në “Facebook” foton e vajzës në gjendje kome, për të sensibilizuar adoleshentët për pasojat që mund të sjellë konsumimi i alkoolit.
Nëna ka rrëfyer në rrjetin social gjithçka i kishte ndodhur vajzës së saj.
15vjeçarja nga Massachusetts, Ryleigh Payton, i kishte thënë se do të shkonte në kinema dhe më pas do të flinte në shtëpinë e shoqes.
Por duket se plani i tyre kishte ndryshuar, pasi vajzat ishin bërë pjesë e një loje alkoolike, me bazë vodkan, dhe më pas i kishte rënë të fikët në rrugë. Kur mbërriti në spital, mjekët konstatuan se 15vjeçarja kishte në trup 2.8 gramë alkool për një litër gjak.
“Pas 14 orësh vajza ime e bukur u zgjua, hapi sytë e saj të bukur jeshilë dhe kërkoi të motrën. Ndoshta kjo foto do të bezdisë disa prej jush, por shpresoj që dhimbja që kaluam ne të shërbejë për të shpëtuar jetën e shumë adoleshentëve të tjerë”, shkruan nëna e vajzës, Melissa Aho.
