Kapet pas disa minutash ndjekjeje nga Policia 25-vjeçari që vodhi automjetin e një shtetaseje dhe u largua me shpejtësi në Vlorë.
Sipas uniformave blu, ngjarja ka ndodhur në zonën e Lungomares Vlorë, ku një grua e ka lënë makinën e saj “Range Rover” të ndezur dhe me bllokazh për të shkuar në market. Ajo është kthyer për pak minuta, por nuk e ka gjetur më mjetin.
Falë kamerave të sigurisë, policia ka mësuar itinerarin e lëvizjes së autorit, i identifikuar si shtetasi F.G. 25 vjeç, i icli u arrestuar nga policia në autostradën Vlorë-Fier.
“Shërbimet e Forcës së Posaçme “Shqiponja” dhe ato të Forcës së Posaçme Operacionale, në bashkëpunim me shërbimet e Komisariatit të Policisë Vlorë dhe të Qarkullimit Rrugor menjëherë pas kallëzimit për vjedhjen e një automjeti, në lagjen “10 Korriku”, kanë organizuar punën për identifikimin dhe kapjen e autorit.
Si rezultat i veprimeve të shpejta hetimore u identifikua autori i vjedhjes së automjetit, shtetasi F. G., 25 vjeç, banues në Fier.
Ky shtetas, pasi ka vjedhur automjetin tip “Range Rover”, në pronësi të shtetases J. P., në lagjen “10 Korriku”, është larguar me shpejtësi, në dalje të qytetit.
Shërbimet e Policisë janë vënë menjëherë në ndjekje të këtij shtetasi dhe pas disa minutash, në autostradën Vlorë-Fier, kanë bërë të mundur kapjen e tij.
Automjeti i vjedhur u sekuestrua në cilësinë e provës materiale”, tha policia.
Materialet procedurale i kaluan Prokurorisë pranë Gjykatës së Rrethit Gjyqësor Vlorë, për veprime të mëtejshme./Opinion.al
