Policia ka arrestuar një 17-vjeçar në Vlorë, pasi vodhi një shumë parash në një lokal në bulevardin “Ismail Qemali” ku ka qenë i punësuar.
Sipas uniformave blu bëhet me dije se i riu kishte vjedhur 80 000 lekë, duke përdorur një kopje çelësi që e kishte siguruar më parë.
“Specialistët për Hetimin e Krimeve të Komisariatit të Policisë Vlorë, pas marrjes së njoftimit se në një lokal në bulevardin “Ismail Qemali” ishte vjedhur një shumë parash, organizuan menjëherë punën për identifikimin dhe kapjen e autorit. Si rezultat i veprimeve hetimore të kryera pas administrimit të pamjeve filmike, bazuar dhe në informacionet e siguruara në rrugë operative, u bë i mundur identifikimi dhe arrestimi i një 17-vjeçari, autori i dyshuar për këtë rast.
Nga hetimet rezultoi se ky shtetas, gjatë natës, ka vjedhur 80 000 lekë, në një lokal ku ka qenë i punësuar, duke përdorur një kopje çelësi që e kishte siguruar më parë”, njofton policia.
Materialet procedurale i kaluan Prokurorisë për veprime të mëtejshme./Opinion.al
