Një 44-vjeçar është arrestuar nga policia, pasi akuzohet për mashtrimin e grabitjes së 10 milionë lekëve të vjetra.
Pas verifikimeve, policia zbuloi se paratë nuk ishin grabitur, por ndodheshin në banesën e 44-vjeçarit. Policia njofton se ra në pranga Gentjan Mahmutaj, punëtor i një kompanie që tregton xhama në Berat.
Ditën e djeshme, Mahmutaj kishte shkuar me furgon te disa klientë të kompanisë për të mbledhur detyrimet, të cilat ishin rreth 10 milionë lekë. Pasi kishte mbledhur detyrimet, ai i kishte thënë pronarit të kompanisë se persona të armatosur i kishin prerë rrugën dhe i kishin marrë paratë.
Ngjarja është denoncuar në Komisariatin e Beratit, i cili nisi hetimet menjëherë. Hetimet zbuluan se e gjithë ngjarja ishte një skemë mashtrimi e 44-vjeçarit.
Njoftimi i policisë:
Nga Specialistët e Seksionit për Krimet u bë arrestimi në flagrancë i shtetasit:
G.M, 44 vjeç, banues në lagjen Kushtrim.
Arrestimi i tij u bë pasi dyshohet se ka vjedhur shumën prej 1 milion lekë të reja, në automjetin e shtetasit R.K.
Shuma prej 1 milion lekë, u sekuestrua në cilësinë e provës materiale.
Materialet i kaluan Prokurorisë së Rrethit Gjyqësor Berat për veprën penale “Vjedhja”, parashikuar nga neni 134/3 i Kodit Penal./ Opinion.al
