Policia kanë zbuluar dy shtetas nga Elbasani, të cilët në bashkëpunim me njëri-tjetrin vidhnin makina.
Uniformat blu kanë vënë në pranga një prej tyre, 26-vjeçarin me inicialet F. B., ndërsa është shpallur në kërkim dhe bashkëpunëtori i tij 35 vjeçar.
Të 2 autorët janë me precedent të mëparshëm kriminal në fushën e armëmbajtjes pa leje dhe prodhimit e shitjes së lëndëve narkotike.
“Specialistët për Hetimin e Krimeve të Komisariatit të Policisë Elbasan, në vijim të punës për goditjen e veprimtarive kriminale në fushën e vjedhjes së pronës dhe për vënien përpara përgjegjësisë penale, të autorëve, kanë organizuar dhe finalizuar operacionin policor të koduar “Retro”. Si rezultat, u arrestua njëri nga autorët e dyshuar, shtetasi F. B., 26 vjeç, banues në Elbasan. Ndërkohë vijon puna për kapjen e autorit tjetër, shtetasit L. P., 35 vjeç, banues në Elbasan.
Nga veprimet hetimore të kryera dyshohet se këta shtetas, më datë 06.10.2024, kanë vjedhur në lagjen “Shënkoll”, një automjet tip “Benz”, në pronësi të shtetasit E. D., 65 vjeç. Gjithashtu, shtetasit F. B. dhe L. P. dyshohen autorë të vjedhjes së ndodhur më datë 24.09.2024, në lagjen “Brigada 17 Sulmuese”, të një automjeti tip “BMW”, në pronësi të shtetasit I. M., 78 vjeç”, sqaron policia.
