Një 19-vjeçar me iniciale M. H, ka rënë në prangat e Policisë së Shkodrës si dhe janë proceduar penalisht dy të miturit 15 dhe 17 vjeç bashkëpunëtorë të tij, pasi dyshohet se kanë grabitur nga vendparkimi një automjet tip furgon dhe më pas e kanë fshehur në pyll.
Policia bën me dije se V.Gj ka njoftuar se gjatë natës disa persona të paidentifikuar i kishin vjedhur automjetin tip furgon në një vendparkim automjetesh në Koplik.
Menjëherë më pas është bërë e mundur gjetja dhe sekuestrimi i automjetit të cilin grabitësit e kishin fshehur në një zonë të pyllëzuar në fshatin Culaj, në afërsi të liqenit të Shkodrës.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
