Një ngjarje e rëndë është regjistruar gjatë orëve të mbrëmje në zonën e Pyllit të Sodës në Vlorë. Një 25-vjeçar është qëlluar për vdekje me thikë në zemër, pas një konflikti me disa persona.
Viktima është identifikuar si Aleksandër Petanaj. I riu u transportua në gjendje të rëndë në spital, ku qëndroi për 4 orë në sallën e operacionit, por nuk mundi të mbijetonte.
Bëhet me dije se gjithçka kishte nisur pas një konflikti që vëllai i tij më i vogël, 18 vjeç, kishte me një grup të rinjsh, ndërsa viktima ndërhyri për ta mbrojtur, por njëri prej tyre e qëlloi me thikë në zemër.
Ndërkohë, mësohet se policia ka arrestuar autorin e krimit. Sipas informacioneve, personi që qëlloi 25-vjeçarin me thikë për vdekje është një 15-vjeçar i identifikuar me inicialet G.T.
Njoftimi i policisë
Policia zbardh dhe dokumenton ngjarjen e ndodhur në orët e mbrëmjes së djeshme.
Më datë 18.06.2020, rreth orës 22:50, në Spitalin Rajonal Vlorë ka shkuar i dëmtuar nga një mjet prerës, shtetasi A. P., 25 vjeç, banues në Vlorë, i cili ka ndërruar jetë pak orë më vonë.
Menjëherë pas ngjarjes, Policia nisi hetimet për zbardhjen dhe dokumentimin e saj dhe falë veprimeve të shpejta, hetimore dhe profesionale u bë identifikimi në kohë rekord, kapja dhe prangosja e autorit, shtetasit G. T., 15 vjeç, banues në Vlorë.
Nga hetimet e kryera dyshohet se ngjarja ka ndodhur në lagjen “24 Maji” Vlorë, pranë vendit të quajtur “Ish-ushqimores”, ku pas një konflikti për motive të dobëta, shtetasi G. T. ka goditur me mjet prerës (thikë) shtetasin A. P., i cili ndërroi jetë rreth 4 orë më vonë në ambientet e spitalit. Grupi hetimor po kryen veprimet e mëtejshme në lidhje me ngjarjen e ndodhur./ Opinion.al
