Policia e Vlorës ka arrestuar 2 persona dhe ka proceduar një 16-vjeçar, pasi kanë thyer xhamat e një marketi në lagjen ‘29 Nëntori’ në qytet për të vjedhur një shumë parash.
Mësohet se grabitja ka ndodhur në orët e para të mëngjesit të datës 16.02.2025, ku autorët vodhën 20 000 lekë nga marketi.
“Menjëherë pas njoftimit se në orët e para të mëngjesit të datës 16.02.2025, ishin vjedhur me thyerje, 20 000 lekë, në një market në lagjen “29 Nëntori”, strukturat hetimore dhe operacionale të Komisariatit të Policisë Vlorë kanë organizuar punën për të identifikuar dhe nxjerrë përpara përgjegjësisë penale, shtetasin/t përgjegjës.
Si rezultat u identifikuan të tre autorët e vjedhjes, konkretisht shtetasi G. M., 26 vjeç, një 17-vjeçar dhe një 16-vjeçar. 26-vjeçari dhe 17-vjeçari u vunë në pranga, ndërsa 16 vjeçari u procedua në gjendje të lirë, për veprën penale “Vjedhja”, kryer në bashkëpunim.
Po hetohet për të dokumentuar vjedhje të tjera që mund të kenë kryer këta shtetas”, njofton policia.
Materialet procedurale iu referuan Prokurorisë së Vlorës, për veprime të mëtejshme./Opinion.al
