Policia Shtetit ka arritur të zbulojë pjesën tjetër të drogës që u tentua të trafikohej nga gomonia që u kap të shtunën pasdite në ujërat e Malit të Zi.
Burimet nga policia thanë se sasia e drogës është gjetur në Bristan, pranë Karaburunit në Vlorë.
Mësohet se është sekuestruar rreth 456 kg kanabis sativa e ndarë në 21 pako, e cila ishte fshehur nga trafikantët gjatë ndjekjes në det nga rojet bregdetare.
Në njoftimin për mediat, theksohet se Policia e Vlorës në bashkëpunim me Sektorin për Hetimin e Narkotikëve në Drejtorinë e Përgjithshme të Policisë së Shtetit dhe Policinë e Malit të Zi janë duke kryer veprime hetimore ndaj shtetasve E.K., M.S., R.M., (shtetas malazez), dhe G.M., L.H., e J.M., (shtetas shqiptar), me qëllim dokumentimin e plotë ligjor të kesaj veprimtarie kriminale.
Gjithashtu, theksohet se materialet hetimore do t’i referohen Prokurorisë për veprën Penale ”Trafikimi i narkotikëve”. Gjatë ditës së djeshme ishte gjetur edhe një sasi prej 28 kg kanabis nga kontrollet e policisë.
Gomonia u kap të shtunën rreth orës 17:30 në Mal të Zi dhe u arrestuan 3 persona shtetas malazez që ndodheshin, ndërsa nuk u gjet drogë.
Në ndjekjen e gomones që zgjati 24 orë u angazhuan policitë e tre vendeve; Shqipërisë, Italisë dhe Malit të Zi.
