Detaje të reja kanë dalë në lidhje me ngjarjen e rëndë të ndodhur në Vlorë, ku shtetasi, Altin Alikaj, u gjet i vrarë në banesën e tij.
46-vjeçari i gjendur i vdekur këtë të shtunë mësohet se është vrarë disa ditë më parë, por trupi i tij i pajetë është gjetur ditën e sotme. Ka qenë nëna e tij, e cila e ka gjetur sot 46-vjeçarin pa jetë brenda shtëpisë së tij, e cila ishte vetëm pak metra nga shtëpia e prindërve të tij.
Sipas raportimeve mësohet se Alikajt i është gjetur një plumb në shpatull, nga krahu i zemrës. Sakaq policia më herët njoftoi se nga këqyrja paraprake e trupit janë konstatuar dëmtime të ngjashme, si ato të shkaktuara me armë zjarri. trupi i tij i pajëtë ndodhet në morgun e Vlorës ku po kryhen ekzaminimet e mëtejshme, për të përcaktuar shkaqet e vdekjes.
Alikaj mësohet se ka hyrë ilegalisht në Shqipëri. Disa kohë më parë, ai ka qenë në Kosovë dhe atje i është mbajtur pasaporta. Gjithashtu, sipas burimeve, pas vrasjes atij i është marrë edhe telefoni, të cilin efektivët apo familjarët nuk e kanë gjetur në banesë.
Po ashtu mësohet se Alikaj ka qenë përdorues i lëndëve narkotike. 46-vjeçari jetonte vetëm, ndërsa prindërit shumicën e kohës jetonin në Greqi. Para se të kryej vrasja, në shtëpinë e viktimës janë helmuar qentë e komshinjve, është prerë automati i dritave, ndërsa në banesë është gjetur një sëpatë me gjurmë gjaku.
