Dy persona kanë kërcënuar dhe dhunuar një 36-vjeçar në Vlorë dhe më pas kanë qëlluar me armë në drejtim të tij.
Policia bën me dije se ka arrestuar një nga autorët e ngjarjes 33-vjeçarin me inicialet E. B ndërsa është shpallur në kërkim bashkëautori, shtetasi J. Rr., 30 vjeç, banues në Vlorë, për kapjen e të cilit vijon puna intensivisht.
Këta persona dyshohet se në bashkëpunim me njëri-tjetrin, kanë kanosur dhe dhunuar shtetasin G. L., 36 vjeç, i cili punonte çoban, në fshatin Ramicë, për t’i marrë atij një shumë parash. Të dy këta shtetas, pasi nuk kanë marrë paratë e kërkuara nga 36-vjeçari, dyshohet se kanë qëlluar me armë zjarri, në drejtim të tij. Shtetasi G. L. ka mundur të fshihet dhe t’u shpëtojë të shtënave.
Materialet procedurale i kaluan Prokurorisë pranë Gjykatës së Rrethit Gjyqësor Vlorë, për veprime të mëtejshme, për veprat penale “Vrasja me dashje”, mbetur në tentativë, kryer në bashkëpunim, “Shtrëngimi me anë të kanosjes ose dhunës për dhënien e pasurisë” dhe “Mbajtja pa leje dhe prodhimi i armëve, armëve shpërthyese dhe municionit”.
