Të shtëna me armë janë regjistruar ditën e sotme në aksin rrugor Levan-Vlorë.
Mësohet se persona të paidentifikuar kanë qëlluar me breshëri plumbash në drejtim të një automjet tip “Golf me targa AA 864 SV.
Mësohet se objektivi i atentatit ka qenë 33-vjeçari Romario Alliraj, banues në Vlorë, i cili në momenti që është qëlluar me breshëri plumbash, ka dalë jashtë rrugës duke pësuar dëmtime të lehta.
Sipas policisë, i riu nuk ka pësuar lëndime nga plumbat, por në momentin që makina është përplasur.
33-vjeçari ishte duke udhëtuar nga Fieri në drejtim të Vlorë, kur gjatë rrugës ai ka rënë pritë të disa personave, të cilët kanë qëlluar mbi 19 plumba në drejtim të tij.
Ndërkohë, policia po punon për zbardhjen e plotë të rrethanave të atentatit si dhe për identifikimin e autorëve.
Kujtojmë që, dy ditë më parë një atentat ndodhi në Vlorë, ku një kalimtar mbeti i plagosur. Ndërsa objektivi ishte Inez Hajrullah, i cili në vitin 2017 mbeti i plagosur rëndë si pasojë e një atentati me eksploziv në makinë.
Njoftimi i policisë
Në vendin e quajtur “Ura e Mifolit” Novoselë, në rrethana ende të paqarta është qëlluar me armë zjarri në drejtim të automjetit që drejtohej nga shtetasi R.A., 33 vjeç, banues në Vlorë, i cili ka humbur kontrollin e mjetit dhe ka dalë nga rruga duke pësuar lëndime të lehta.
Nuk ka të lënduar me armë zjarri. Grupi hetimor ndodhet në vendin e ngjarjes dhe po kryen hetimet në lidhje me zbardhjen dhe sqarimin e rrethanave. Po punohet nëpërmjet kontrollit të territorit dhe veprimeve të tjera hetimore për identifikimin dhe kapjen e autorit/ëve./ Opinion.al E.Xh.
