Pronarët e bizneseve në zonën e “Lungomares” në Vlorë vijonë të protestojnë lidhur me kufizimet që janë vendosur në kuadër të masave anti-COVID.
Mbrëmjen e sotme pronarët e bizneseve në Vlorë kanë bërë dy kërkesa, zgjatjen e orarit të lejimit të muzikës deri në 24:00 dhe lejimit të orës policore të lëvizjes nga 24:00 në 02:00. Ata shprehen se nuk do të tërhiqen nga protestat deri në plotësimin e kërkesave të tyre.
“Këtu është kulmi i protestës sonë, ne paralajmëruam mbyllje totale për 24 orë të bizneseve. Jemi mbledhur këtu të gjithë në një zë unanim, që ne këtë cështje e kemi problem serioz dhe është si puna e armëve kimike, që u mblodhën të gjithë, që nuk kishte asnjë lidhje politike, por është indinjatë e sinqertë që na prek të gjithëve. Të hiqet gardhi policor, nuk ka polici në sfond, por vetëm turizëm. Fasha orare të paktën të kalojë deri në orën 02:00 dhe pa ndotjen akustike që e përmendi edhe kryeministri që jemi plotësisht dakord, por ne nuk mund të ndjekim dot klientët në orën 2 dhe me logjikë të shëndetshme nga ora 24:00 deri në 2 të mëngjesit klientët janë më në pakicë dhe ambienti është më i sigurt dhe qetë përsa i përket covid dhe ora muzikore që kërkuam, që ne na u duk si një karamele që na u dha nga ora 22:00 deri në 23:00, sidoqoftë faleminderit edhe për atë. Ne kërkojmë që deri në 24:00 ne të kemi një sfond muzikor që të ushtrojmë biznesin tonë. Nesër do të vazhdojmë dhe do të presim përgjigjen e kryeministrit, jemi duke diskutuar për hapat e radhës. Besojmë që kjo protestë e jona dhe ky mesazh të merret shumë seriozisht nga qeveria. Jo vetëm me fashën muzikore, por edhe policore që nga 24:00 të shkojë në 02:00, dhe si në cdo vend të Europës të mos vijnë policët me uniformë, por civilët. Sikur ne ushtrojmë profesionin, kërkojmë të njëjtën gjë edhe nga policia. Për policët e thjeshtë kemi rezervat tona. Ne e bëmë këtë protestë në mënyrë më të qytetëruar. Ne hapin e parë e bëmë, ne presim që kryeministri dhe qeveria të na e kthejë me të njëjtën dashamirësi” tha njëri prej pronarëve./ Opinion.al
