Ka dështuar mbledhja e komisionit rregullator në KQZ, ku do të shqyrtohej propozimi për zgjatjen e afatit të votimit në 55 Qendra Votimi në Qarkun Vlorë, për shkak të aktivitetit sportive Giro D’Italia.
Partia Socialiste e kishte paraqitur këtë kërkesë që ditën e shtunë në KQZ për shtyrje të afatit të votimit deri në orën 22:00, por nuk është arritur kuorumi në mbledhjen e Komisionit për ta miratuar këtë propozim.
Ndërkohë, Franc Nuri tha se Partia Demokratike e ka shprehur mjaft qartë dje qëndrimin e saj.
“Dua të shpreh konsideratën time sepse ne kishim një qëndrim zyrtar qysh dje si replikë dhe përgjigje ndaj PS-së. I parashtruam të gjitha argumentet për këtë propozim. Meqënëse sot Celibashi nuk e vuri në lëvizje institucionin, por vetë një anëtar i KQZ-së vendosi ta merrte përsipër këtë kërkesë. Duhej thirrur nga zoti Celibashi, ai nuk mori iniciativë për të thirrur Rregullatorin. Prandaj gjykuam se nuk ishte kompetencë e Rregullatorit. Votimi në Vlorë nuk do të zgjatet, qendrat e votimit do të mbyllen në orën 19:00. Një event sado madhor të jetë nuk mund t’i mbivendoset procesit zgjedhor”, tha Nori.
