Ambasadorja e BE-së në Tiranë, Romana Vlahutin ka qenë të shtunën në Vlorë, nga ku deklaroi se projekti për Lungomare-n duhet të mbyllet në fund të këtij muaji.
Romana Vlahutin: “Isha këtu në fund të janarit dhe atëherë më dhanë të gjitha garancitë e mundshme se gjithçka do të mbaronte më 30 prill.
Kjo vazhdon të mbetet data kur duhet të përfundojnë të gjitha detyrimet kontraktuale që ekzistojnë. Unë dua të mbetem optimiste, por do të mbetem optimiste me kujdes të madh sepse të gjitha ata që jetojnë në Vlorë dhe ata që e vizitojnë Vlorën e shohin se sa shumë punë ka ende për t’u bërë.
Kemi rënë dakord me kompaninë që të na japë një raport ditor për punimet, për të parë në ç’pikë ka vajtur puna. Është koha që ky projekt të përfundojë”.
Ky projekt financohet me fondet e Bashkimit Europian dhe kjo mbase e përligj kërkesën e llogarisë nga zonja Vlahutin.
Ajo njihet si mbështetëse e qeverisë së majtë dhe e Kryeministrit Rama ndaj mesa duket edhe në këtë rast po kujdeset që ky projekt i madh për qytetin bregdetar të mbyllet në prag të zgjedhjeve.
/Opinion.al
