Kryetarja e Parlamentit dhe njëkohësisht Presidentja në detyrë e Kosovës, Vjosa Osmani ka rezultuar pozitive me koronavirus.
Lajmi është konfirmuar nga vetë Osmani përmes një postimi në rrjetet sociale. Ajo shkruan se është infektuar me COVID-19 pasi kishte pasur kontakt me disa të afërm që më herët kishin rezultuar pozitivë.
Gjithashtu, Osmani bën me dije se në dy javët e ardhshme do të punojë nga shtëpia, ndërsa iu bën thirrje qytetarëve për kujdes maksimal.
Postimi nga Vjosa Osmani:
Të nderuar qytetarë!
Pasi disa të afërm me të cilët kisha kontakt rezultuan pozitivë në testin për Covid-19, u testova në IKSHKP dhe pak më parë u njoftova se edhe unë kam rezultuar pozitiv.
Në dy javët e ardhshme do të punoj nga shtëpia, duke u kujdesur që secili dokument a vendim që kërkon shqyrtim e vendimmarrje dhe që lidhet me përgjegjësitë e mia në të dy funksionet shtetërore që i ushtroj, të trajtohet në kohë. Po ashtu, një numër takimesh do t’i vazhdoj nëpërmjet platformave elektronike.
Përkundër kujdesit maksimal, po shihet që këto ditë virusi është kudo, më i përhapur se kurrë më parë, njëjtë i rrezikshëm si çdoherë. Prandaj, uroj që ta tejkalojmë këtë sfidë bashkërisht, duke mos e injoruar rrezikun nga virusi dhe kujdesin që duhet treguar. Mirëmbetshi e shëndet të gjithëve!/ Opinion.al
