Nëse do të ekzistonte një çmim për skenarin më të mrekullueshëm në një tratativë apo transaksion në merkato, atëherë të gjithë duhet të jenë të sigurtë dhe të bindur, ai do t’i akordohej transferimit të Sissoko nga Neëcastle drejt Tottenham. Histori e pabesueshme, lëvizje të çrregullta komplotuese dhe një finale vërtetë surprizë. Spurs-at arritën të mundin konkurrencën e Everton në fotofinishin e merkatos. Por gjithsesi ky është vetëm akti përfundimtar i një tratative mbreslënëse. Gjithçka startoi në maj, atëherë kur skuadra e Newcastle pësoi rënien nga Premier League, me francezin që kërkoi të lihej i lirë për tu transferuar gjetkë.
Pas një Kampionati Europian, në të cilin Moussa Sissoko u shfaq si protagonist, Newcastle ka pritur deri në momentin e fundit për të lënë të lirë futbollistin e saj të çmuar. Oferta më e mirë për francezin mbërriti dy orë para përfundimit të afatit të merkatos, në shumën 35 milionë euro, që u shoqërua menjëherë me një shtrëngim duarsh dhe një urim për suksese në të ardhmen. Moussa Sissoko firmos një kontratë 5-vjeçare duke zgjedhur fanellën me numrin 17, ndërkohë që Tottenham barazon rekordin personal për shumën e shpenzuar në një blerje të vetme. Të njëjtën shumë kanë shpenzuar Spurs-at në vitin 2013 kur blenë Lamelan nga Roma.
Me rastin e ditës së fundit të merkatos, Sissoko’s iu dha leje nga Federata Franceze e Futbollit që të mund të largohej nga qëndra e grumbullimit të ekipit kombëtar, me qëllim që të kthehej në Angli për të vendosur mbi të ardhmen e tij. Kështu ndodhi. Ndonëse mëngjesin e djeshëm, destinacioni i tij final ishte ende i panjohur. Ishte një garë kokë më kokë mes Everton dhe Tottenham, me blutë e Evertonit ndjeshëm në avantazh.
Oferta e parë e Spursave, e refuzuar në mënyë të menjëhershme nga Neëcastle ishte ndalur në shumën 18 milionë euro, ndërkohë që klubi i trajnerit Koeman ishte gati të depozitonte pesë këste me nga 7 milionë euro, saktësisht aq sa ishte shuma e kërkuar nga klubi i Newcastle. Tratativa të suksesshme dhe marrëveshje e arritur, madje edhe me futbollistin. Ka një aeroplan privat në gatishmëri për të dërguar Sissoko në Liverpool, madje u prenotuan edhe vizitat mjekësore. Por, pikërisht atëherë kur askush nuk mund ta mendonte, ndodh edhe përmbysja më e madhe e të gjithë kësaj merkatoje verore. Francezi nuk ngjitet në bordin e avionit që e priste.
Koeman provon ta telefonojë, por telefoni i Sissoko është i fikur. Sissoko nuk përgjiget, teksa duket hapur që Everton nuk përbën më zgjedhjen e parë të futbollistit. Tottenham është futur në mes të tratativave duke prishur pazarin e arritur më parë mes Sissoko dhe Everton. Duke barazuar ofertën e bërë më parë nga blutë e Everton, skuadra londineze e Tottenham ka siguruar shërbimet e Sissoko. Mundësia për të luajtur në Champions League ishte një tentacion shumë i madh për francezin, teksa tashmë, trajneri i Spurs, Pochettino mund të festojë.
