Tre persona janë vënë në pranga nga policia e Durrësit, që pas tri javësh hetime ka arritur të zbulojë aktivitetin e tyre në trafikimin e veprave të trashëgimisë kulturore.
Sipas policisë janë arrestuar në flagrancë shtetasit: A. V., 49 vjeç, banues në Fier, i cili drejtonte automjetin tip “Toyota”, ku u gjetën veprat e artit; A. V., 37 vjeç dhe R. Z., 48 vjeç, të dy banues në Tiranë. Shtetasi A. V. siguronte veprat e artit, ndërsa dy shtetasit e tjerë gjenin klientelën për shitjen e tyre.
Në cilësinë e provës materiale janë sekuestruar dy vepra që i përkasin periudhës së antikitetit dhe që do të shiteshin kundrejt shumës 18 deri në 25 mijë euro secila. Statuja dhe vazoja dyshohej se ishin vjedhur në parkun e Apolonisë në Fier.
Vijon puna për zbardhjen e plotë të kësaj veprimtarie kriminale./Opinion.al
