Prokuroria e Tiranës po heton për bashkëpunëtorë të mundshëm të autorëve të grabitjes së filialit të bankës tek ish-blloku. Sipas Prokurorisë, autorët e krimit, për të cilët nuk ka ende asnjë ide se kush mund të jenë, kanë pasur një orientim të saktë për vendin e dhomës kasafortë.
Nga ana tjetër, Prokuroria ka bërë me dije dje disa detaje të reja nga hetimi i ngjarjes. Sipas akuzës, më 8 gusht 2016, rreth orës 08:15, Policia është vënë në dijeni se ishte vjedhur gjatë natës banka e nivelit të dytë që ndodhet në rrugën “Ismail Qemali”.
Gjatë veprimeve hetimore është konstatuar se persona të paidentifikuar, duke hapur një vrimë në murin që ndan bankën me një ambient tjetër privat, dikur pab, kanë hyrë në ambientin e brendshëm të bankës dhe më pas kanë hapur një vrimë tjetër në murin prej betoni të kasafortës së bankës.
Njëri prej autorëve ka hyrë brenda ambienteve të dhomëskasafortë dhe ka marrë nëpër raftet metalike shumën rreth 190.000.000 lekë të vjetër. Më pas janë larguar nëpërmjet dy vrimave, të cilat ishin hapur më parë në mur. Veprimet e autorëve janë kryer në datën 5 dhe 6 gusht 2016. \
DINAMIKA
Bazuar në kontrollin e ambientit rrethues të bankës, rezulton se autorët fillimisht kanë ndërruar fishekun e derës së ish-pabit dhe që aty kanë hyrë brenda. Fillimisht kanë shkuar e kanë vepruar në faqen e një muri dhe më pas, pasi kanë hasur në beton, e kanë lënë atë dhe kanë shkuar në faqen e murit prej tulle, ku kanë hapur një vrime në të cilën mund të hynte lirshëm një trup njeriu.
Pasi kanë hyrë në ambientin e brendshëm të bankës ku ishte dhe dhoma kasafortë, kanë vepruar me mjete pune (çekiç, daltë, kriko) te muri prej betoni i dhomëskasafortë. Veprimin përfundimtar ata e kanë kryer në datën 06.08.2016, ku kanë hyrë në orën 23:13 dhe kanë dalë në orën 23:19.
Në ambientin e pabit janë gjetur sende që dyshohet se u përkasin autorëve, si leva hekuri, kriko automjeti, pllaka metalike, tuba metalikë.
ALARMI DHE KAMERAT
Banka ka sistem kamerash dhe dhoma kasafortë ka sistem sensorësh. Nga goditjet që kanë bërë autorët ditën e premte, më 5 gusht natën, dhe të shtunën, po natën, sensorët kanë dhënë alarm te telefoni i drejtorit të bankës, shefi i sigurisë së bankës dhe te salla operative e policisë private. Të premten, datë 5 gusht 2016, pas marrjes së sinjalit, është paraqitur në bankë drejtori Luigj Gjonaj dhe pasi nuk ka konstatuar gjë, është larguar. Ditën e shtunë ka rënë sinjali i sensorit të kasafortës dhe aty përsëri ka shkuar drejtori i bankës, Luigj Gjonaj, si dhe shefi i sigurisë së kësaj banke, Florjan Skarra, e kjo dallohet dhe në pamjet filmike, por nga kontrolli ata nuk kanë konstatuar asgjë. / Panorama.al Trazhgim Sokolaj
