Presidenti i Mongolisë, Battulga Khaltmaa, dhe një sërë zyrtarësh të nivelit të lartë, janë vendosur për 14 ditë në karantinë, pas kthimit të tyre nga një vizitë në Kinë.
Autoritetet vendase njoftuan se kjo është një masë paraprake e marrë për sigurinë e tyre por dhe për të parandaluar përhapjen e Covid-19, nëse rezulton se mes delegacionit ka ndonjë person të infektuar me koronavirus.
Presidenti i Mongolisë është kreu i parë i një shteti që viziton Kinën, që nga janari, kur ky vend vendosi masa më të ashpra për udhëtimet për shkak të përhapjes së virusit. Ai qëndroi për disa ditë në Pekin, së bashku me ministrin e Jashtëm, dhe u takua me homologun vendas, Xi Jinping dhe kryeministrin, Li Keqiang.
Nga ana tjetër, koronavirusi ka treguar se “nuk kursen” as politikanët. Tri ditë më parë, mediat ndërkombëtare konfirmuan se zëvendësministri i shëndetësisë së Iranit, Iraj Harichi ka rezultuar pozitiv ndaj koronavirusit dhe është futur në karantinë. Kjo shënoi dhe rastin e parë që një zyrtar i një niveli të tillë, prekej nga virusi vdekjeprurës./Opinion.al
