Kreu i partisë “Mundësia” Agron Shehaj gjatë një interviste në emisionin “Opinion” është pyetur për vizitën e tij në SHBA dhe konkretisht në shtëpinë e presidentit Trump në Mar-a-Lago.
Ndërsa është akuzuar në Shqipëri, se vizita e tij ka qenë një lobim i paguar, Shehaj tha se ka qenë në atë takim me ftesë të një senatori dhe se nuk ka paguar asnjë lek për të qenë pjesë.
“Akuza për pagesën në Mar -a -Lago është shumë e rëndë dhe vjen direkt nga Kryeministri, i cili ditën e parë kur unë bëra një video nga jashtë Mar- a- Lagos, bëri një koment, ja Agroni nxori një video nga jashtë.
U detyrova të nxirrja pamje nga brenda për të treguar që kam takuar kongresmenë. Unë kam shkuar me ftesë të një senatori. Është shtëpia e presidentit ku takon zyrtarë të lartë, sipërmarrës”, tha Shehaj, ndërsa shtoi se kjo është një akuzë e rëndë.
“Kryeministri më akuzon mua, por jo vetëm mua, edhe ata që gjoja kanë marr para nga unë dhe gjoja kam fshehur lobimin. Edi Rama po luan me zjarrin. Është i vetmi që ka përfunduar në një dosje të FBI ku është akuzuar se ka qenë pikërisht ai që ka paguar për t’ju afruar presidentit Trump”, u shpreh kreu i partisë “Mundësia”./Opinion.al
