Kryeministri i Kosovës, Albin Kurti vizitoi sot Shqipërinë në vizitën e parë zyrtare në detyrën e re. Ai zhvilloi takime me kryeministrin Rama, presidentin Meta, kryeparlamentarin Ruçi si dhe me kreun e Partisë Demokratike, Lulzim Basha.
Në një postim në Facebook, Kurti falenderon krerët e institucioneve për pritjen dhe thekson se Shqipëria dhe Kosova “nuk e kanë luksin ta shohin njëra-tjetrën me syzet e diplomacisë”.
Ai nënvizon si fusha bashkëpunimi të menjëhershëm ekonominë dhe arsimin. Kurti bën gjithashtu me dije se takimi i ardhshëm mes dy qeverive do të zhvillohet në fund të marsit në Shkodër.
“U dakorduam të krijojmë komisionin ndërshtetëror i cili i analizon ecurinë e 77 marrëveshjeve mes të dy vendeve tona dhe në fund të marsit, në Shkodër, kur të takohen dy Qeveritë tona të trajtojmë ecurinë e punës së deritashme e të përcaktojmë punën e re që duhet të bëjmë”, shkruan ai.
“Dekada e tretë e shekullit XXI duhet të sjellë një fillim të fuqishëm, si asnjëherë më parë, të bashkëpunimit e bashkërendimit Kosovë-Shqipëri. Nuk mohoj arritjet e së shkuarës, por jemi larg asaj çka dëshiron populli ynë, larg asaj që është brenda mundësive tona reale. Dy vendet tona janë prioritet i njëra-tjetrës dhe nuk ka çështje që presin, në asnjë fushë”, mbyll postimin e tij Albin Kurti. /Opinion.al
