Kryeministri Edi Rama dhe Presidenti i Turqisë, Rexhep Taip Erdogan, po zhvillojnë një konferencë të përbashkët për shtyp në Turqi, pas firmosjes së marrëveshjes për krijimin e Këshillit të Bashkëpunimit Strategjik të nivelit të lartë.
Gjatë fjalës së tij Presidenti i Turqisë, Rexhep Taip Erdogan, deklaroi se Shqipëria është mik dhe aleat i Turqisë, teksa foli edhe për çështjet e diskutuara me kryeministrin Edi Rama.
“Shqipëria është një vend mik, vëlla dhe aleat. Ne jemi dy popuj vëllezër që kemi luftuar sëbashku dhe kemi lënë gjurmë në histori. Në ditët e sotme kemi gjurmë të përbashkëta të historisë nga Elbasani në Korçë apo nga Shkodra në Vlorë. Frymëzuar nga historia jonë ne e konsiderojmë si detyrë t’i përmirësojmë këto marrëdhënie. Me rastin e vizitës, sapo nënshkruam marrëveshjen për krijimin e bashkëpunimit strategjik në nivelin e lartë. Ky hap do të mundësojë zhvillimin e mëtejshëm në çdo fushë. Përveç diskutimit të çështjeve bilaterale diskutuam edhe ato rajonale në fushën e ekonomisë, kulturës dhe se çfarë mund të bëjmë në projektet e ardhshme. Shqipëria përjetoi dy tërmete të fuqishme dhe pas çdo tërmeti ne dhamë ndihmën tonë. Ne vendosëm të ndërtojmë edhe 522 njësi banimi për vëllezërit tanë. Shpresojmë që të përfundojë ndërtimi në gusht dhe t’ua dorëzojmë këto ndërtesa vëllezërve tanë. Besoj se ky do të jetë një simbol i ri i fatit të përbashkët të dy vendeve. Gjatë takimit, ne vlerësuam këto çështje dhe marrëdhëniet tona ekonomike. Ne jemi investitori më i madh i huaj në Shqipëri. Më shumë se 600 kompani turke që ofrojnë punësim për rreth 15 mijë vëllezër. Në synojmë të rrisim investimet në fushën e infrastrukturës dhe turizmit”, tha Erdogan.
Gjithashtu Erdogan theksoi se një nga pikat e axhendës së takimit me kryeministrin Edi Rama ishte lufta kundër terrorizmit dhe rritja e bashkëpunimit për këtë çështje.
“Një nga pikat kryesore të takimit tonë ishte dhe lufta kundër terrorizmit. Ne kemi vendosur që organizata e FETO është një kërcënim për dy vendet. Ne nuk do të lejojmë që të FETO të helmojë marrëdhëniet mes dy vendeve”, tha Erdogan./Opinion.al
