Presidenti francez Emmanuel Macron ka mbërritur mbrëmjen e sotme në Shqipëri.
Ai është pritur në aeroportin e Rinasit në Tiranë nga zv.kryeministrja Belinda Balluku për shkak se kryeministri Edi Rama ndodhej në samitin e Procesit të Berlinit që ishte drejt mbylljes të punimeve.
Më pas, kreu i shtetit francez është pritur nga kryeministri Edi Rama dhe bashkëshortja e tij, Linda në ambientet e Pallatit të Brigadave.
Aty u zhvillua një ceremoni, ku Macron i dorëzoi shkrimtarit Ismail Kadare Dekoratën e “Oficerit të Madh të Legjionit të Nderit”.
Gjatë fjalës së tij, ai dha vlerësimet më të larta për veprat e Kadaresë, ku veçoi romanin “Pallati i Ëndrrave”, duke u shprehur se aty u pasqyruan ëndrrat e një populli të tërë.
“Kontribuat në zgjimin e madh të popujve që ngritën perden e hekurt”, iu drejtua Macron shkrimtarit.
“Të jeni i sigurt se vepra juaj nuk ka humbur asgjë nga vlera e saj, liria që i mbyllnin gojën ka pëshpëritje më të forta se britmat. Ka treguar atë që bashkon vendet tona në mënyrë të pandashme dhe e mbart kryeministri juaj me shumë talent, këtë dashuri për Evropën. Për këtë rol si poet i Ballkanit, si rapsod i Europës, kam nderin sot t’ju ngre në gradën e Oficerit të Lartë në Urdhrin e Legjionit të Nderit. Zoti Ismail Kadare në emrin e Republikës Franceze ne u ngremë në rangun e Oficerit të Lartë të Legjionit të Nderit!”, i tha më tej Macron.
