Sipas rregullave të reja të miratuara nga Departamenti Amerikan i Shtetit, të gjithë aplikantët për viza do të duhet të paraqesin informacionet në lidhje me rrjetet e tyre sociale. Rregullorja e re thotë se aplikantët duhet të paraqesin emrat e rrjeteve të tyre sociale, adresat e emailit dhe numrat e telefonit.
Ata që përjashtohen nga ky rregull janë vetëm disa aplikantë për viza diplomatike, por pjesa tjetër që shkon për të punuar, studiuar ose turizëm, duhet të dorëzojnë këto informacione.
“Ne jemi vazhdimisht duke punuar për të gjetur mekanizma për të përmirësuar proceset tona të shqyrtimit për të mbrojtur qytetarët amerikanë, duke mbështetur udhëtimin e ligjshëm në Shtetet e Bashkuara”, thekson Departamenti Amerikan i Shtetit.
Ky verifikim është bërë edhe më parë por vetëm për personat që kishin qenë në vende ku operojnë grupe terroriste.
Çdokush që gënjen për përdorimin e rrjeteve të tyre sociale mund të përballet me “pasoja serioze të emigracionit”, sipas një zyrtari që foli për gazetën The Hill.
Kur u propozua vitin e kaluar, autoritetet vlerësuan se propozimi do të prekte 14.7 milionë njerëz në vit. /Opinion.al
