Në nisje të vitit të ri shkollor nuk kanë munguar mesazhet e personaliteteve të politikës shqiptare.
Presidenti, Ilir Meta përmes një statusi në rrjetet sociale iu uron një vit të mbarë të gjithëve, veçanërisht vogëlushëve që nisin klasën e parë.
“Një vit të mbarë dhe me plot arritje të shkëlqyera në rrugën e dijes, veçanërisht për vogëlushët, të cilët ulen sot për herë të parë në bankat e shkollës! Urime të ngrohta dhe shumë suksese për të gjithë mësuesit dhe profesorët në misionin e tyre fisnik!”, shkruan Meta.
Kryeministri Edi Rama me pamje nga shkollat e reja të rindërtuara pas tërmetit ka uruar vitin e ri shkollor.
“MIRËMËNGJES
dhe me zilen e parë që bie për disa nga shkollat e reja të rindërtuara pas tërmetit, uroj përzemërsisht çdo nxënës që nis sot vitin e ri shkollor, shumë suksese e mbarësi në këtë rrugëtim të bukur dijeje për të ardhmen”, shkruan Rama.
Ndërsa kreu i PD, Lulzim Basha në mesazhin e tij teksa uron nxënësit dhe mësuesit thotë se edhe ky vit shkollor do të jetë sfidues për shkak të pandemisë Covid-19, ndaj bën apel për kujdes.
“Urime të përzemërta nxënësve dhe mësuesve, anembanë Shqipërisë në nisjen e këtij viti shkollor! Urime prindërve që përmes punës dhe sakrificave ushqejnë ëndrrat dhe ambiciet e fëmijëve të tyre! Urime vogëlushëve që plot emocione ulen për herë të parë në bankat e shkollës, në hapjen e një kapitulli të rëndësishëm për jetën e tyre dhe gjithë shoqërisë sonë! Edhe ky vit i ri shkollor do të jetë sfidues për shkak të pandemisë, ndaj kujdesi nuk duhet të mungojë për të mbrojtur shëndetin e njëri-tjetrit dhe të familjeve tuaja. Suksese të gjithëve”, shkruan Basha./Opinion.al
