Ish-kreu i SHISH Visho Ajazi Lika i cili u dorëhoq nga detyra në fund të tetorit duket se ka mirënjohje jo vetëm nga Rama që do ta çojë ambasador në NATO por edhe nga Meta. Sot Presidenti i Republikës i ka akorduar atij dekoratën e Artë të Shqiponjës me motivacionin për kryerjen me sukses të detyrave në luftën kundër kanabisit dhe terrorizmit.
Po sot Meta, dekretoi lirimin nga detyra të ambasadorit tonë në NATO, Leonard Demi. Si emër i përfolur në media për të shkuar në këtë detyrë të lartë është pikërisht Visho Ajazi Lika.
Një përshkrim i shkurtër mbi Visho Ajazin
Visho Ajazi Lika ishte një emërim i ish-Kryeministrit Sali Berisha. Në vitin 2012, nga puna si zv/minister i Inovacionit ai u emërua si drejtor i Shërbimit Informativ Kombëtar. Disa herë u fol në media për një marrëdhënie të vështirë mes tij dhe Kryeministrit Rama, nga 2013 e këtej kur ndryshoi qeveria dhe në pushtet erdhën të majtët. Por Visho Ajazi Lika ia doli të punojë më gjatë me Ramën. Ai dha dorëheqjen në 30 tetor të këtij viti dhe asnjëherë nuk u prononcua për motivin e largimit nga shërbimi informativ. PD-ja që e kishte emëruar reagoi duke e lidhur dorëheqjen e tij me hetimin për Saimir Tahirin. Kjo nuk dihet sa e vertetë është. Ajo që dihet është se Visho Ajazi pret të shkojë ambasdor në NATO. Sakaq sot u vlerësua me dekoratë edhe nga Presidenti Meta./Opinion.al
