Ekstremisti grek Babis-Harallambos Karathanos është ndaluar në Kakavijë, teksa tentonte të hynte në Shqipëri. Ai do merrte pjesë në varrimin e Kostandino Kacifas që u vra javën e kaluar në shkëmbim zjarri me RENEA-n në Bularat.
Po kështu janë edhe 5 persona të tjerë, (emrat e të cileve ende nuk dihen) që nuk janë lejuar të hyjnë në Shqipëri. Ata mbanin bluza me shkrime antishqiptare dhe për këtë arsye u është mohuar hyrja në vendin tonë.
Kush është Harallambos?
Ai ka lindur në Greqi, por prindërit e tij janë me origjinë nga Dropulli.
Babis nga viti 1982-1989 ka qenë kryetari i SFEVA – (Bashkimi i Studentëve për Luftën e Vorio-Epirit).
Babis-Harallambos Karathanos ka qenë ish-deputet i partisë Demokracia e Re, më tej i partisë ekstremiste të djathtë greke, LAOS.
Harallambos është i njohur në Shqipëri, pasi ka marrë pjesë në disa aktivitete në vitet e fundit me minoritetin grek.
