Vazhdon të zvarritet formimi i Komisionit, që do të verifikonte viktimat e dhunës seksuale gjatë luftës në Kosovë.
Kjo kategori e grave shprehet tejet e dëshpëruar nga mungesa e përkrahjes institucionale që nga mbarimi i luftës.
Ministria e Punës, ka argumentuar, se për shkak të ndjeshmërisë së rastit, po ecin me hapa të sigurt.
Ndonëse në shtator kjo ministri hapi konkursin për zgjedhjen e anëtarëve të këtij komisioni, i cili do të përbëhet nga një psikolog, sociolog, jurist dhe një organizatë joqeveritare, përzgjedhja e tyre ende nuk është bërë.
Zyrtarë të ministrisë thonë se deri në pjesën e parë të vitit të ardhshëm nuk pritet të nisë punën ky komision, ngase pas formimit të tij, anëtarët duhet të përpilojnë formularët, pastaj të mbajnë trajnime për këtë çështje dhe vetëm më vonë të merren në intervista viktimat e dhunës seksuale.
Derisa gjatë luftës së fundit në Kosovës konsiderohet se numri i grave të dhunuara është 22 mijë, Ministria e Punës nuk beson në këto shifra, pasi, sipas kësaj Ministrie, më shumë se një mijë viktima nuk mund të jenë.
