Kryetarja e Lëvizjes Socialiste për Integrim, Monika Kryemadhi, ka reaguar në lidhje me tërmetin e fuqishëm që goditi vendin mëngjesin e së martës, duke shkaktuar dhjetëra viktima e qindra të plagosur.
Përmes një postimi në rrjetet sociale, Kryemadhi shprehet se tërmeti i fuqishëm ka vrarë të gjithë shoqërinë tonë. Kryemadhi i ka kërkuar qeverisë që të përqendrohet në shërbimin ndaj njerëzve duke lënë fjalimet dhe shfaqjet mediatike.
Në reagimin e saj, Monika Kryemadhi ka publikuar pamje nga Mesha e Lutjes në Katedralen e Shën Palit në Tiranë.
Postimi i Kryemadhit:
Mes dhembjes së pamatë sot në ditën e zisë kombëtare, i lutem Zotit me besim dhe shpresë për të shpëtuar jetën e cilitdo që gjendet ende nën rrënojat e tërmetit shkatërrimtar. I lutem Zotit t’iu japë forcë dhe ngushëllim të gjithë atyre që kanë humbur njerëzit e tyre të dashur, që ta përballojnë dhembjen e madhe.Sot më shumë se kurrë duhet të gjejmë forcë me besim në Zot dhe me dashuri pranë njëri-tjetrit, sepse tërmeti na ka vrarë të gjithëve, por forca e dashurisë për njëri-tjetrin na bën më të fortë! Lus Zotin ti japë forcë dhe arsye qeverisë, që të kuptojë se shërbimi ndaj të gjithë njerëzve të prekur nga pasojat e tërmetit, është më i rëndësishëm se fjalimet dhe shfaqjet mediatike. Solidariteti dhe dashuria është forca jonë!/ Opinion.al
