Studentët po vijojnë për të tretën ditë radhazi protestën përpara Ministrisë së Arsimit, kundër vendimit të marrë nga Komitetit Teknik i Ekspertëve për zhvillimin e mësimit online.
Studentët theksojnë se edhe pas vendimit për zhvillimin e mësimit online, ata nuk kanë marrë asnjë njoftim me e-mail se si do të vijojë procesi mësimor.
Gjithashtu, ata kanë kërkuar të kthehen në auditore të zhvillojnë mësimin pasi vendimi i Komitetit Teknik ishte i papritur, ndërsa ata kishin bërë pagesat e konvikteve dhe qirave të banesave të cilat nuk iu rikthehen pas.
Ndërkohë studentët i kanë drejtuar Ministrisë së Arsimit edhe disa kërkesa të tjera, siç është rimbursimi i qirave të tyre, mësimi i alternuar ndërmjet online dhe auditorë, leksionet online, ndërsa seminaret në auditorë, pagesat e internetit falas dhe të dedikuara për studentët si dhe mundësimi i pajisjeve teknologjike të nevojshme për studentët që nuk kanë akses online.
Kujtojmë se për pagesat e konvikteve, rezidenca Studentore 1 dhe 2 ka njoftuar më herët se pagesat e kryera në muajin nëntor nga studentët do të jenë të vlefshme për muajin dhjetor./ Opinion.al
