Të gjithë hajdutët kanë viktimat e tyre të preferuara, por edhe vendin e tyre të preferuar për të vjedhur.
Në fakt deri më tani ishim mësuar me hajdutët ordinerë të xhepave në urban, por një i moshuar kishte si objektiv të tij portofolët e pacientëve në spitale.
Ai është N.L, 62 vjeë nga Kuçova, i cili udhëtonte çdo ditë në spitalin e Fierit që e kishte kthyer si një vend pune, me 8 orar, ku gjuante portofolët e pacientëve që shtroheshin në Urgjencën e Spitalit Rajonal, për të marrë ndihmën e parë mjekësore.
Lajmin e bën të ditur Policia e Fierit që bën të ditur se pas një punë 1 mujore u bë e mundur kapja e autorit.
“Pas një pune hetimore 1 mujore, u bë i mundur identifikimi dhe kapja e autorit të dyshuar i cili ishte kthyer në një shqetësim për të moshuarit që merrnin shërbimet në Urgjencën e Spitalit Rajonal Fier. Specialistët për Hetimin e Krimeve në Komisariatin e Policisë Fier arrestuan në flagrancë shtetasin N.L, 62 vjeç, banues në Kuçovë”- njofton policia.
Sipas Policisë, vjedhjet kishin ndodhur në kohë të ndryshme, derisa u bë evidentimi i autorit.
“Arrestimi i këtij shtetasi u bë pasi në Urgjencën e Spitalit Rajonal Fier, ky shtetas dyshohet se në kohë të ndryshme ka kryer disa vjedhje, ku nga puna hetimore e deritanishme është bërë e mundur dokumentimi i tre prej tyre, konkretisht vjedhja e portofolit të shtetasit G.T., I.D, dhe A.Gj.” D.l
