Frika pas valëve të tërmetit që goditën Shqipërinë, u pasua nga frika e grabitjes së banesave për banorët të cilët u detyruan ti braktisnin ato si pasojë e dëmeve në godinë.
Sot policia ka dy raste të tilla, në Durrës dhe në Shkodër. Mësohet se një 42-vjeçar është arrestuar në flagrancë duke vjedhur në një nga pallatet e evakuuara nga tërmeti në lagjen 17 në Durrës. I ndaluari është qytetari me inicialet L.T, banues në Durrës.
Burime zyrtare nga policia bëjnë me dije gjithashtu se në Krujë janë arrestuar edhe dy të rinj nga Shkodra, të cilët ishin duke qarkulluar me një automjet do kryenin vjedhje në zonën e Krujës. Nga kontrolli i ushtruar në brendësi të automjetit, Policia gjeti dhe sekuestroi mjete që shërbenin për hapjen e dyerve të banesave dhe të automjeteve, doreza e pajisje të tjera që do shërbenin për të realizuar vjedhjet.
“Në përfundim të veprimeve të para u bë arrestimi në flagrancë i drejtuesit të automjetit, shtetasit E. R., 25 vjeç, banues në lagjen Dobraç, Shkodër, i dënuar më parë dhe i pasagjerit shtetasit N. P., 23 vjeç, banues në Shkodër. Materialet në ngarkim të shtetasve të mësipërm do t’i kalojnë Prokurorisë, për veprat penale “Vjedhja” dhe “Sigurimi i mjeteve për vjedhje”, në bashkëpunim.”, thuhet në njoftimin e policisë/ Opinion.al
