Në parkun Arkeologjik të Apollonisë janë kryer gërmime të paligjshme dhe janë vjedhur objekte të trashëgimisë sonë kulturore. Kështu bëri të ditur policia, e cila ka ndaluar përgjegjësin dhe ka nisur hetimet për drejtorin dhe një tjetër punonjës të parkut.
Gjatë operacionit “Apollonia” u ndalua përgjegjësi i Sektorit të Ruajtjes e Administrimit të Parkut Arkeologjik të Apollonisë Fier, Arjan Dimo, 43 vjeç, tha policia.
Në hetim është Marin Haxhimihali 47 vjeç, Drejtor i Parkut Arkeologjik të Apollonisë Fier. Po kështu po hetohet dhe Q.T, 66 vjeç, punonjës në Park.
Policia tha se drejtori, përgjegjësi dhe punëtori nuk kanë marrë masa për ruajtjen dhe sigurimin e veprave të artit e kulturës në Parkun Arkeologjik të Apollonisë. Ata kanë lejuar që nëpërmjet gërmimit të kundraligjshëm në Parkun Arkeologjik të vidhet një sasi e konsiderueshme e vlerave arkeologjike me rëndësi për identitetin e trashgimisë kulturore. Policia nuk thotë se kush janë autorët e kësaj vjedhje, por vetëm bën të ditur se po ndiqen penalisht personat përgjegjës për ruajtjen e Parkut. /Opinion.al
