Moti i keq me reshje shiu dhe erëra të forta në një pjesë të mirë të vendit ka shkaktuar probleme kryesisht në disa qytete.
Kështu tragetet e nisura nga porti i Barit në Itali, pritet të mbërrijnë në portin e Durresit me rreth 7 orë vonesë. Parashikohet që era të arrije një shpejtësi deri 45 metër në sekondë, ndërsa forca e detit pritet të shkojë 7-8 ballë. Anijet e tonazhit të mesëm dhe të ulët nuk lejohen të dalin në lundrim deri në përmirësimin e kushteve të motit.
Kurse në Vlorë stuhia me erë dhe me reshje ka shkaktuar dëme. Dritaret e disa bizneseve janë thyer kurse qarkullimi në rrugët e qytetit është vështirësuar ndjeshëm. Ndërkohë në det nuk është lejuar asnjë anije të niset për lundrim.
Ky urdhër u dha nga Kapiteneria e Portit që dje dhe do të vazhdoje deri në një urdher të dytë. Parashikohet që intensiteti i reshjeve në këtë zonë të rritet, ndërkohë që Prefektura është bërë gati për të përballuar situatën e emergjencës së mundshme.
