Shukri Xhelili ka kërkuar lirinë dje në gjykatë. Përmes avokatit ai ka kërkuar masën detyrim paraqitje, por gjykata nuk e mori parasysh duke e lënë në arrest me burg. Sa i përket fakteve, avokati është shprehur se videoja e Shukri Xhelilit është e montuar. Ai ka sjellë edhe disa shembuj të tjerë nga gjyqet e personaliteteve, siç ishte rasti i Metës, ku videoja nuk u mor si provë. Sipas avokatit, Ferdinand Doja, gjykata s’mund ti besojë këtij filmimi pasi është i montuar.
Pretendimet e mbrojtësit janë kundërshtuar nga përfaqësuesi i Prokurorisë në sallën e gjyqit. Sipas prokurorit, bazuar në veprimeve hetimore të deritanishme ekziston dyshimi i arsyeshëm se Xhelili ka kërkuar favore seksuale nga kallëzuesja Anisa A. në këmbim të punësimit të saj në një nga institucionet vartëse të Bashkisë Dibër.
Gjatë një prononcimi për mediat jashtë sallës së gjyqit, mbrojtësi Doja këmbënguli në pavlefshmërinë e videoregjistrimit. “Gjykata e Lartë ka dhënë më shumë se një vendim lidhur me këto lloj regjistrimesh, që janë absolutisht të pavlefshme si prova. Asnjëherë
nuk janë marrë si provë nga drejtësia shqiptare”, tha avokati i ish-kreut të bashkisë Dibër.
