Banorët e zonës së Shkozës kanë dalë në protestë për të mbrojtur banesat e tyre nga prishja. Në mbështetje të tyre janë dhe deputetët e PD, Grida Duma dhe Aldo Bumci.
Prishja e objekteve në zonë sipas Bashkisë së Tiranës bëhet në kuadër të projektit për ndërtimin e Unazës së Madhe të kryeqytetit.
Banorët shprehen se të njëjtët persona që e kanë pasur shtëpinë në pozicione të ngjashme më to u janë legalizuar banesat. Ato shtojnë se projekti mund të spostohet dhe ndërtesat nuk kanë pse të shemben.
Aldo Bumçi në një prononcim për mediat tha se Rama dhe Veliaj nuk e meritojnë të jenë aty ku janë.
Aldo Bumçi: “Është dimër, është kohë festash, por njerëzve do t’u duhet të mendojnë tani për hallin se do dalin mes katër rrugësh. Këto kanë hallin e shtëpisë sot, por zgjidhja përfundimtare është një: siç po ua bën Edi Rama për shtëpitë, duhet me ja bë Edi Ramës te shtëpia e tij, te shtëpia e tij që është kryeministria. Në atë kryeministri, në atë zyrë ai merr vendime me prish shtëpitë. Siç po ua bën këtyre banorëve, duhet me shku me ja bë atje”.
Pyetje: Si e shpjegoni standardin nga ana e bashkisë dhe e kryetarit të bashkisë? Disa banorëve u ofrohet bonus qiraje një vit, për banorët e Unazës së Re u tha 3 vjet, ndoshta ngaqë po ngrenë zërin më tepër. Këtyre banorëve nuk u është ofruar asnjë lloj bonusi, as kredi e butë, as banesë sociale, asgjë. Këtë si duhet ta kuptojmë?
Bumçi: “Kjo është shumë e thjeshë. Ai që është kryetar bashkie është i pafytyrë. Nuk e meriton me qenë aty. Këta janë qytetarë të qytetit të tij. Këta njerëz që shihni këtu janë banorë të qytetit ku Erion Veliaj është kryetar bashkie. Si mundesh të nxjerrësh ti mes katër rrugëve qytetarët e qytetit tënd? Si mundet? Si mundet t’i trajtosh në mënyrë të diferencuar, si mund t’i quash shpellarë? Të bësh lojëra duke mbledh punonjësit e tu e duke i paraqit si njerëz që janë duke prishur vetë shpitë e veta? Ky është më i mbrapshtë se Enver Hoxha. Enver Hoxha të prishte shtëpinë, ky të nxjerr në televizor e të thotë: ka ra dakord vetë me e prish shtëpinë. Këtë thotë Erion Veliaj, një njeri fallso, i pafytyrë. Ka vënë një pemë në mes të Tiranës dhe mendon se qyteti është I gëzuar. Po njerëzit po humbasin shtëpinë, more i pafytyrë, more fallso”.
