Një gropë gjigande është hapur në rrugën e Belshit, duke rrezikuar jetën e qindra përdoruesve të saj. Janë afro 40 mijë banorë të Shezës, Belshit, Dumresë, por edhe fshatrave të Lushnjës dhe më gjërë që kalojnë në aksin Pajove-Belsh.
Nga investigimi i kryer nga ABC News, rezulton se shembja ka ndodhur në një segment ku nga njëra anë eshte lumin Shkumbin dhe në anë tjetër ndodhet kodra. Ndërkohë një kthesë e papritur u shfaqet drejtuesve të automjeteve dhe fill pas saj gropa e thellë.
Por nuk mbaron me kaq. Shembja ka përparuar poshtë bazamentit të rrugës dhe qarkullimi mbi asfalt është thjesht një shans.
Të vetmet shenja sinjalizuese janë disa fije plasmasi dhe nuk ka asnjë bllok apo pritë mbrojtëse.
Banorët dhe drejtuesit e automjeteve shprehen se është shumë e rrezikshme të qarkullosh në këtë segment edhe pse aty çdo ditë, levizin furgonë, autobuzë dhe mjete të tonazhit të rëndë.
Bashkia Peqin ka njoftuar Shtabin e Emergjencave, Drejtorinë e Përgjithshme të Rrugëve dhe Instancat përkatëse, por deri më tani askush nuk është dukur. Nevojitet një fond i konsiderueshëm, që duket Bashkia Peqin nuk e ka për të rindërtuar rrugën e shembur.
Burimi: AbcNews
