Pikat e basteve sportive dhe kazinotë elektronike, në të gjithë vendi nga e marta e 1 Janarit cilësohen aktivitete të paligshme.
Vendimi i qeverisë për të mbyllur më 31 Dhjetor 2018, në të gjithë territorin e Shqipërisë, kazinotë elektronike, bastet sportive, sallat e bingove, bastet online, bastet me gara në pistë, u miratua në fund të muajit Tetor.
Pati nga ato kompani që operuan në tregun e basteve deri në përfundim të këtij afati. Ndërsa shumë prej kompanive të basteve përgjatë ditëve të fundit hoqën tabelat e reklamat e shumta të llotove që dikur i hasje ngado në qytet dhe në vend të tyre lexon njoftime: “Jepet me qira”.
Nga të dhënat zyrtare, bastet sportive që u mbyllen janë afërsisht 5000, ndërsa disa nga investitorët e tyre e shikojnë si mundësi të vijimit të aktivitetit në vendet fqinj si Kosova apo Maqedonia.
Sipas specialistëve të fushës, varësia nga bixhozi dhe lojërat e fatit ka rrënuar ekonomikisht mjaft familje në Shqipëri. Ato vlerësojnë se kjo ka krijuar një plagë sociale për shkak të pasojave të rënda që sjell varësia, duke varfëruar çdo ditë e më shumë shtresat në nevojë.
Nga ana tjetër, qeveria ka parashikuar që të papunët e basteve do trajtohen me kurse rikualifikimi, në mënyrë që ata të kualifikohen dhe të gjejnë një mundësi tjetër punësimi.
Ndërkohë që nga 1 Janari 2019 nisë funksionimi i skuadrës dixhitale për mbylljen e të gjitha faqeve të basteve online jashtë vendit. /abcnews.al
