Gazetarja e kronikës, Klodiana Lala, deklaroi se Dritan Shaqir Gradica ndodhet në Angli, ndërsa ka mbaruar dy fakultete dhe punon si arkitekt.
Lala u shpreh në studion e emisionit ‘Opinion’, se në verifikimet e hyrje-daljeve në sistemin TIMS, nuk rezulton të ketë kryer lëvizje të shpeshta nga Shqipëria në drejtim të Vjenës, ku dhe besohet se ishin lëvizje tranzit.
Sipas saj, udhëtimet më të shpeshta i ka pasur në shtator-tetor dhe nëntor të 2017-ës, ndërsa në dhjetor nuk rezulton të ketë pasur lëvizje të shpeshtë.
Ajo tha se ai lëvizte për dy ose tre herë në muaj drejt Shqipërisë.
“Hyrja e fundit në territorin shqiptar ka qenë në muajin janar të këtij viti, i cili ka hyrë me një automjet luksoz nga pika kufitare e Kakavijës, por një javë pasi ka dalë, përsëri nga Kakavija, çuditërisht sipas sitemit TIMS, rezulton të ketë dalë në këmbë”, -tha Lala.
Gazetarja u shpreh më tej se ish-gjykatësi Gradica i ka konfirmuar se të birit i kishte humbur pasaporta në vitet 2000 ku dhe ka pasur një denoncim në atë kohë të bërë pranë autoriteteve shqiptare.
Lala gjatë ditës së sotme ka kryer disa hetime rreth identitetit të Dritan Gradicës pranë institucioneve shqiptare për të mësuar më tepër rreth personit në fjalë.
“Babai i Dritan Gradicës pranon se gjeneralitetet përkojnë me ato të djalit të tij, por mohon që personi i arrestuar në Spanjë të jetë i biri, për të cilin tha se prej vitesh jeton e punon në Londër”,- u shpreh Lala.
Nga të dhënat e gjendjes civile rezulton se me këtë emër ekziston vetëm një person i regjistruar.
Ai quhet Dritan Shaqir Gradica, i datëlindjes 5 korrik 1975, lindur në Vlahej, Has dhe banues në Tiranë.
Sipas të dhënave të siguruara, Dritan Gradica, rezulton të jetë djali i ish-gjykatësit të Apelit Ushtarak, Shaqir Gradica, tashmë në pension.
Shqiptarët e identifikuar si Dritan Gradica dhe Julian Deblini, u vunë në pranga tri ditë më parë në Madrid, në hollin e një hoteli, vetëm pak pasi autoritetet e policisë sekuestruan një sasi rekord prej 1 ton kokainë dhe një valixhe me 1.55 milionë euro.
Droga, e cila, mendohet të jetë blerë tek “Klan Del Golfo” në Kolumbi, ishte transportuar drejt Madridit me Charter dhe në secilën prej pakove kishte të vulosur siglën CR7, me të cilën identifikohet ylli i futbollit, Cristiano Ronaldo.
Mediat spanjolle shkruajnë se hetimet rreth grupit kriminal nisën në nëntor të vitit të kaluar ndërsa operacioni u ndërmor nga Drejtoria e Seksionit kundër Narkotikëve të Kolumbisë, DEA amerikane në koordinim me Europol.
