Kallëzimin e paralajmëruar të premten ndaj kreut të Këshillit të Emërimeve në Drejtësi, Presidenti Ilir Meta e firmosi këtë të martë dhe e dërgoi në tre Prokurori. Pasi e firmosi kallëzimin ndaj kreut të Këshillit të Emërimeve në Drejtësi, padia ndaj Ardian Dvoranit mbërriti në orën 16:00 në Prokurorinë e Përgjithshme. Njëherazi ky kallëzim është dorëzuar edhe në Prokurorinë e Krimeve të Rënda dhe atë të Tiranës.
Presidenti Meta e akuzon kryetarin e Këshillit të Emërimeve në Drejtësi për dy vepra penale; atë të shpërdorimit të detyrës si dhe përvetësim titulli apo detyrës shtetërore në lidhje me procesin e emërimeve për anëtar të Gjykatës Kushtetuese.
Po ashtu këto ditë është folur se presidenti ka në dorë një video, me prova përvëluese, për Gjykatën Kushtetuese. Por se çfarë ka në këtë video, ende nuk dihet, megjithëse zërat janë të shumtë. Luan Rama, nga LSI, këtë të martë tha se:“Me aq sa e njoh unë personalisht presidentin, të jeni i bindur që presidenti nuk operon me shashka”.
“Sot Presidenti ka denoncuar zyrtarisht gjithë materialin që ka grumbulluar, provat pikërisht për këtë çështje. Unë mendoj që presidenti ka dorëzuar gjithçka që ai ka si prova të fajësisë së kryetarit të KED-së. Mos bëjmë sikur nuk e kuptojmë, video me prova, video me fakte nga mbledhjet e KED-së. Në mbledhjet e KED-së regjistrimi bëhet edhe audio edhe video”, tha më tej ai./ Opinion.al
